Shoreline

#tamil: உலகமே நாடோடியா திரிஞ்ச அப்பவே தமிழன் படைத்த சரித்திரம் : நின்னு பேசும் தமிழர் வரலாறு.!

Jul 02 2019 07:40:00 PM

'கல்தோன்றி மண் தோன்றாக் காலத்தே வாளோடு முன்தோன்றி மூத்த குடி' என்று தமிழினத்தின் பழமையினைப் பாராட்டிப் பேசுகிறார் பைந்தமிழ்ப்புலவர் ஒருவர். உலகின் பிறபகுதி மக்கள் நிலையான வாழ்வின்றி அமைதியற்று வாழ்ந்த காலத்திலேயே தமிழர்கள் நல்ல அரசியல் அமைப்பினையும், சமுதாய ஒருமைப்பாட்டினையும், வாணிகச் சிறப்பினையும், இலக்கியச் செல்வத்தினையும் பெற்று வாழ்ந்து வந்தார்கள்.

கடல், ஆர்கலி,முந்நீர்,பரவை, புணரி முதலிய கடலையுணர்த்தும் தூய தமிழ்ச்சொற்களும், நாவாய், ஓடம், மரக்கலம், தோணி, தெப்பம், மிதவை, கலம், கப்பல், கட்டுமரம், திமில், அம்பி முதலிய மரக்கலத்தின் வேறு பெயர்களும், தமிழர் கடல் வாணிகத்தில் சிறப்புற்றிருந்தனர் என்பதற்குச் சான்று. கி. மு. பத்தாம் நூற்றாண்டிலேயே தமிழ்நாடு, சிரியா, பாபிலோனியா, எகிப்து முதலிய நாடுகளோடு வாணிகத் தொடர்பு கொண்டிருந்தது. தமிழ் நாட்டின் மணம் பரப்பும் சந்தனம், ஆங்கிலத்தில் சந்தல் (Sandal) ஆனது. மயிலை ஆகுபெயரால் உணர்த்தும் 'தோகை' என்ற சொல் 'துக்கி' (tukki) என்று ஹீப்ரு மொழியில் வழங்குகிறது.

"தமிழில் அரிசி என்பது கிரேக்கத்தில் 'ஒரிசி' எனவும், கறுவாய் என்பது 'கற்பியன்' எனவும், இஞ்சிவேர் என்பது 'சிக்கி பெரோசு' எனவும் 'பப்பியிலிருந்து' 'பெப்பரி' எனவும் பெயர்ந்து சென்ற மொழிகளாகும். கிறிஸ்து சதாப்தத்தின் ஆரம்ப நூற்றாண்டுகளில் ஐரோப்பாவுடன் நடைபெற்ற தென்னிந்திய வாணிகத்தைப் பற்றிய விவரங்கள் பல கிடைத்துள்ளன.வேதங்களில் குறிப்பிடப்படாத யானை, கி. மு. ஏழாம் . நூற்றாண்டில் அசிரிய நாட்டு மன்னனுக்கு அன்பளிப்பாக அளிக்கப்பட்டது. நீலிச்சாயம் தோய்க்கப்பட்ட துணிகள் எகிப்துக்கும் பாரசீகத்திற்கும் அனுப்பப்பட்டன.

சேர நாட்டின் தேக்குமரம் பிற நாட்டில் கட்டடங்கள் கட்டவும், கப்பல்கள் கட்டவும் உதவியது. யவனர் மிளகு கொண்டு சென்றனர். பொன்னும் மதுவும் கொண்டு வந்தனர். அவர்கள் வாழ்ந்த குடியிருப்புகளும் தமிழ் நாட்டில் இருந்தன. புதுச்சேரியின் அருகே “ அரிகாமேடு' என்ற இடத்தைத் தோண்டிப் பார்த்ததில், அங்கே யவனக் குடியிருப்பு இருந்தது என்பது தெரிந்தது. இப்படி பல வரலாற்று அதிசயங்களை அன்றே சத்தமில்லாமல் நிகழ்த்தியுள்ளனர் நம் முன்னோர்கள்.